Infografıkany jasaǵan Amangeldi Qııas, «EQ»
Arqan kerip áıel bosandyrý dástúri kelmeske ketti desek te, táýbe, eteginen bala saýlaǵan aıaýly analar bar aramyzda. Solaı bola turǵanymen, ajalmen arpalysyp, «tar qursaǵyn keńitken, tas emshegin jibitken» ana men náresteniń ómirin aman alyp qalý – ońaı is emes. Bul jaýapty mindet, eń aldymen, akýsher-gınekolog mamanyna júkteletini belgili. Janna Ámirbekova bolsa, sol asa jaýapty qyzmetti osymen on jyldyń kóleminde abyroımen atqaryp keledi.
Shybyn jany shúberekke túıilip, tolǵaǵy qysqan áıel men sábıdiń janyn saqtap qalý qashan da qıyn. Al jahandy jaılaǵan COVID-19 indeti kezinde jaǵdaı tipti kúrdelene túskeni aıtpasa da anyq. Bul mamannyń kásibı sheberligi synalatyn qıyn-qystaý kezeń dese de bolady.
– Koronavırýs indeti qoǵamnyń qaı salasyna bolsyn keri áserin tıgizgenin jaqsy bilemiz. Ásirese bosanatyn júkti áıelder qaýymy úshin ońaı bolǵan joq. Asqynǵan jaǵdaılarmen de betpe-bet kelip jattyq. Bul rette elimizdiń Densaýlyq saqtaý mınıstrliginiń qadaǵalaýymen arnaıy sarapshylar toby qurylǵan bolatyn. Bul top osy indetti emdeý joldarynyń protokolyn ázirleýmen aınalysty. Men – sol protokoldy ázirlegen avtorlardyń birimin, – dedi PhD doktory.
Búginde Qaraǵandy qalasynda eńbek etip júrgen bilikti maman – anyǵynda qazirgi Túrkistan oblysyna qarasty Maqtaaral aýdany Tabysty aýylynyń týmasy. 2003 jyly juldyzy janyp, armany oryndalyp Qaraǵandy medısına ýnıversıtetine oqýǵa qabyldanady. Keıin osy bilim ordasynda magıstratýrada, doktorantýrada oqyp, sheberligin shyńdady. Bir adamǵa jeterlik bilimi, oqyǵan-toqyǵany bola tursa da ana men balanyń amandyǵyn oılaǵan jas maman munymen de shektelip qalǵan joq. El aýmaǵyndaǵy ǵylymı ortalyqtarda tájirıbe jınaqtap, dáris tyńdady. Tipti el aýmaǵy bylaı tursyn, Fransııa, Malaızııa, Reseı, Nıderlandy, Túrkııa memleketterine arnaıy saparlap, oıyn óristetti, biliktiligin jetildirdi.
Qazirgi tańda ózi bilim alǵan ýnıversıtet qabyrǵasynda akýsherlik, gınekologııa jáne perınatologııa kafedrasynyń meńgerýshisi. Shákirt tárbıelep, jıǵan tájirıbesimen bólisip, bolashaq mamandardy oqytyp jatqan jaıy bar. Buǵan qosa Qaraǵandy qalasyndaǵy №2 perınataldy ortalyǵynda akýsher-gınekolog maman retinde eńbek etip keledi. Sanaly urpaqqa sapaly bilim berip qana qoımaı, júkti áıelderdiń de alǵysyna bólenip júr. Máselen, byltyr sáýirde Janbota (esimi ózgertildi) esimdi azamatsha joldasymen birge qabyldaýyna jazylady. Atalǵan áıel 5 jyl kóleminde bedeýlik dıagnozymen esepte turypty. Barmaǵan jeri, baspaǵan taýy joq. Ártúrli jerde em qabyldaǵan kórinedi. Biraq soǵan saı nátıje bolmaǵan.
– Bul iste, eń bastysy – durys dıagnoz qoıý. Pasıenttiń hal-jaǵdaıyn zerttep-zerdeleı kele analyq bezderi durys jumys istemeıtinin anyqtap, óz qolymmen operasııa jasadym. Keıin arada azdy-kópti ýaqyt ótkende sol ota óz nátıjesin berdi. Áıeldiń boıyna tabıǵı jolmen, ózdiginen bala bitti. Bir qyzyǵy, bir emes, birden egiz balaǵa júkti boldy. Bıyl qańtarda 34 aptada balanyń sýy erte ketip, tabıǵı jolmen bosandyryp aldym. О́mirge bir ul, bir qyz keldi. Sábıler ýaqytynan buryn dúnıege kelgen soń bir aıǵa jýyq ýaqyt baqylaýymyzda bolyp, keıin aman-esen úıine shyǵaryp saldyq. Alǵysyn jaýdyrǵan ata-ananyń, týǵan-týystarynyń qýanyshynda shek joq, – dedi J.Ámirbekova.
Ana – tirshiliktiń kózi, ómirdiń ózi. Náresteniń kindigi kesilgen sátte jańa ómirdiń túndigi túriledi. Al sol kindikti kesip, túndikti túrip júrgen Janna Ámirbekova syndy isine adal, antyna berik mamandar. Endeshe, otandastarymyz ózgeden buryn osyndaı adamdardy úlgi tutyp, medısına salasy mamandarynyń eńbegin baǵalaı bilýge tıis. Búgingi qoǵam talaby da – osy.
